am namitag simmer den uf paraguay go shoppe. det isch alles, vor allem elektronik vill guenstiger und ich han en laptop kauft. aber mal de reie nah. de car het eus ad grenze gfahre und mir sind zfuess dur de zoll und ueber dbrugg wo uf paraguay fuehrt. am endi vo dere brugg hets e staubigi strass mit viiill auto und toeff und luet. es het vill dreckigi und armi luet wo sache verchaufed und mer chunt ueberhaupt nueme drus wo was isch. en bueb het eus denn agsproche und gseit er schafft fuer es shoppingcenter und fuehrt eus wo mer ane wend. er het eus ueber dstrass gfuehrt und ine schmali dunkli gass womer sendi nid gseh het. de adriano ischer butzmunter nahgloffe, aber mir andere hend all angst gha und hend denkt, de fuehrt eus ine falle und mir werded usgraubt. mir sind im denn doch langsam und vorsichtig gfolgt und hend feststellt, das er eus de richtig weg zeigt het und das das di einzig gass isch wo zu dem shopping womer gsuecht hend fuehrt. aber das isch scho chli es abentuer gsi, dstrasse erinnered a indie und mer misstraut jedem wo a eim verbilauft. zum glueck hemir aber de julio, euse guide gha, ohne de hettemer glaub nuet gfunde. nachdem mir eusi ichaeuf beendet hend hetter eus au grad es taxi organisiert, naemli sin vater, wo eus i sim van ueber dgrenze bracht het ohni oepis muese verzole.
uf de brugg nach paraguay
die ominoese gasse
dstrass in paraguay und de julio(hinder em taxi)
womer wider in brasilie uf de car gwartet hend, hend di einte vo eusere gruppe uf de strass das spil mit de drue charte gspillt wo mer dcharte mit em zeiche im blick mues bhalte. die luet wo das mit eim spiled mached das supergschickt. es het immer komplize wo sspil started und verluered, so das mer denkt: "naeh, isch de bloed, es isch doch ganz eifach" und au mal spillt. mer isch ganz konzentriert ufs spiil und merkt nid, wie anderi komplize afanged eim umzchreise. uf jede fall spillt mer und guennt paar mal verluert paar mal und de isatz wird immer hoecher. wenn den all dis geld setzisch und denksch du hesch di richtig charte imblick bhalte, dreht de ander di erst charte um. wiss. di zweit charte:wiss. ha, du hesch scho gunne! denksch du. di dritt charte: wiss. niemer het gseit das ei charte es zeiche mues ha. uf jede fall isch das eim passiert. die gauner hend sis geld packt und sind devo gsecklet.
also wener irgendwenn i euem lebe somne spiil begegned, spiled nie! und seged alne andere si soeled sich devo fern halte ;) (ich weiss, ihr denked ez, de isch en tubel, aber es passiert)
am abig simmer d"light-show" am damm vo itaipu go aluege. das lauft so: mer fahrt mit me car det ane, es rise zueg. det isch mer det, wartet, dlichter goend us und zwei praesentatore choemed use, als wenn das dpremiere vomne riise theater mit supestars waer. blabla, mir hend dehr ine das rise ereignis zpraesentiere, blabla. denn wird en churze dokumentarfilm zum damm zeigt ( de produziert oepe 90% vom strom fuer paraguay und 20% fuer brasilie) und denn gahts los: die Light-Sow! riese musig, mit jedem takt wird chli meh vom damm beluechtet... und fertig, slicht gaht wider a. all lueged sich a und froeged sich gegesitig:"isch das alles gsi????" ja. all laufed zrug zum car, mer fahrt eimal noecher am damm nah und fahrt hei. also, wer mal nach foz do iguacu gaht, es lohnt sich nid fuer dlightshow zzale (erwachsni zahled 12reais) luegeds lieber uf youtube, isch oepe glich spektakulaer. aber de damm selber isch sehr idruecklich und gross und imens. aber ich waer lieber am tag ueber de damm gloffe als die "show" zgseh.
damm mit liecht
am naechste morge simmer den ad wasserfaell, de eigentlichi grund das mer uf foz do iguacu gaht. zersch inere kilometer lange schlange gstande und den gmerkt, das die schlange nur isch zum ticket chaufe. nacher naml inere kilometerlange schlange gstande zum iegah. bim iegahhets eine wos ticket kontroliert und eine wos fuer eim in schlitz steckt das drehchruez dreht. also die chaented mindestens 2 agstellti spare. typisch brasilie :)
schlussendlich het sich swarte aber glohnt. mer fahrt mitme touristebus am wald nah, mer hend au es guerteltier gseh ufem weg *joooehhhh* und den chamer paar kilometer amne pfad nahlaufe womer dwasserfaell gseht. es isch mega idruecklich, es het mega vill wasserfaell und si sind riisig. ufde bilder gseht mer nid so guet, will wemer det isch chamer vo links nach rechts luege und es hoert nid uf. ufem pfad gseht mer au ganz vill tusigfuesslerwuerm(ich weiss nid was es wuerklich fuertig sind) und mega vill summervoegeli. und wemer glueck het gseht mer au anderi tier. leider hemmer nur ein morge ziit gha und sind nacher heigfahre. aber ich gang definitiv namal zum mal mitem boot de wasserfaell nahzfahre (wemer das macht, gaht mer am beste ide badhose, will mer wird seehr nass) und uf di argentinisch siite uebere go dwasserfaell aluege...
